Сядзіба ў в. Абрэнбшчызна. Гродзенскі раён. Верагодна, дом пабудаваны ў сярэдзіне ХІХ ст., аб чым сведчыць архітэктурны стыль з выкарыстаннем аконіц, запазычаных з народнага дойлідства, паўкруглага франтона - з архітэктуры барока. Збоку прыбудаваны ашклёны зімовы сад.

Малюнак 1868 г.

     Фабрыка сукна ў пас. Альбярцін, цяпер вуліца Калгасная г. Слоніма. Гродзенская вобласць. Звычайны прамысловы будынак без адзначанай стылявой характарыстыкі. Не захавалася.

Малюнак 1877 г.

     Палац Незабытоўскіх у в. Аляшавічы. Гродзенская вобласць. Двухпавярховы палац з рызалітамі і тэрасай на калонах пабудаваны ў 1-й палове ХІХ ст. у стылі позняга класіцызму.

Малюнак 1861-1877 гг.

     Місіянерскі касцёл Прасвятой Тройцы і палац Шадурскіх у в. Асвея. Верхнядзвінскі раён, Віцебская вобласць. Палац у стылі класіцызму пабудаваны ў 1782 годзе на беразе  Асвейскага возера. Зруйнаваны ў час вайны 1914 г., засталіся руіны і парк.

Літаграфія з малюнка 1875-1876 гг.

     Палац Тышкевічаў у в. Астрашыцкі Гарадок. Мінскі раён. Двухпавярховы палац графа М. Тышкевіча ў маёнтку Грудак, адбудаваны ў 1870-я гады пасля пажару 1860 г. у стылі рэтраготыкі. Палац акружаны пейзажным паркам. Не захаваўся.

Малюнак 1864-1867 гг.

     Сядзіба Швыкоўскіх у в. Беніца. Маладзечанскі раён, Мінская вобласць. Драўляны сядзібны дом з калонным порцікам пасярэдзіне і крыламі па баках пабудаваны ў 1779-1781 гг. паводле праекта італьянскага архітэктара К. Спампані. Сядзіба не захавалася.

Малюнак 1875-1877 гг.

     Палац Храптовічаў у г. Бешанковічы. Віцебская вобласць. Двухпавярховы палац з цэнтральным рызалітам; з левага боку аднапавярховы флігель, з правага - вежа фарнага касцёла. Палац пабудаваны ў 1770-я гг. у стылі ранняга класіцызму, належыў Агінскім, потым Храптовічам. Палац і парк існуюць.

Малюнак 1876 г.

     Палац Снядзецкіх у в. Болтуп. Ашмянскі раён, Гродзенская вобласць. Маёнтак у ХІХ ст. з'яўляўся маёмасцю Андрэя Снядзецкага, вядомага хіміка, урача, біёлага і філосафа, а потым яго нашчадкаў. Будынак асіметрычнай кампазіцыі з тэрасай на першым паверсе і балконам у двухпавярховай частцы, аб'ёмы завершаны шчытамі з аркатурнай акаймоўкай. Палац не захаваўся.

Малюнак 1876 г.

     Сядзіба Путкамераў у в. Больценікі. Воранаўскі раён, Гродзенская вобласць. Аднапавярховы дом з тэрасай на калонах і мансардай, з правга боку драўляны флігель. Сядзіба не захавалася.

Малюнак 1875-1877 гг.

     Сядзіба ў в. Брэнна. Гродзенская вобласць. Аднапавярховы ампірны дом пабудаваны ў 1-й палове ХІХ ст. з калонным ганкам і ступеньчатым атыкам і сходамі. Сядзіба не захавалася.

Малюнак 1863 г.

     Палац Эйсмантаў у фальварку Бурдукаўшчызна ў в. Буйнавічы. Баранавіцкі раён, Брэсцкая вобласць. Палац пабудаваны ў 1-й палове ХІХ ст. у стылі ампір. Двухпавярховы з аднапавярховымі бакавымі крыламі, тэрасай і балконам на сярэднім трохгранным эркеры. Палац не захаваўся.

Малюнак 1876 г.

     Касцёл і кляштар кармелітаў у                   г.п. Бялынічы. Магілёўская вобласць. Кляштар заснаваны ў 1624 г. віленскім ваяводам, канцлерам Вялікага княства Літоўскага Львом Сапегам. Мураваны касцёл Найсвяцейшай Дзевы Марыі пабудаваны ў 1742-1763 гг. у стылі барока. Пасля скасавання кляштара 19 ліпеня 1832 г.  касцёл стаў парафіяльным, пасля пажару 1859 г. адноўлены. У 1876 г. па загаду магілёўскага губернатара перароблены на царкву. Касцёл не захаваўся.

Літаграфія 1873 г. з малюнка н. Орды.

     Кляштар картэзіянцаў у г. Бяроза. Брэсцкая вобласць. Агульны выгляд барочнага касцёла св. Юзафа і Казіміра і кляштара з брамай і агароджай, з двума гранёнымі вежамі, створанага італьянскім архітэктарам Джанбатыста Джыслені ў 1648-1689 гг. па фундацыі Льва САпегі. Кляштар знаходзіцца ў зруйнаваным стане.

Літаграфія з малюнка 1861-1877 гг.

     Сядзіба Дашкевічаў у в. Вайцэхаўшчына. Бераставіцкі раён, Гродзенская вобласць. Аднапавярховы дом з двума калоннымі ганкамі, з правага боку аднапавярховае збудаванне. Пабудавана ў 1-й палове ХІХ ст. у стылі позняга правінцыяльнага класіцызму.

Малюнак 1868 г.

     Касцёл св. Ежы і кляштар дамініканцаў у в. Валынцы. Глыбоцкі раён, Віцебская вобласць. Двухвежавы касцёл і кляштар заснаваны ўладальнікамі маёнтка Збельскімі-Шчытамі ў 1716 г. Пабудаваны з цэглы ў 1749-1766 гг. у стылі ракако. Кляштар захаваўся часткова.

Малюнак 1875-1876 гг.

     Сядзіба Ордаў у в. Варацэвічы. Іванаўскі раён, Брэсцкая вобласць. Драўляны дом пабудаваны ў 2-й палове XVIII ст. пад уплывам стыляў барока і класіцызму. Аднапавярховы будынак пад ламаным дахам са слуповым двух'ярусным ганкам і мансардай пад трохвугольным франтонам, вакол пейзажны парк. Сядзіба не захавалася.

Малюнак 1860 г.

     Сядзіба Ордаў у в. Варацэвічы. Іванаўскі раён, Брэсцкая вобласць. Драўляны дом пабудаваны ў 2-й палове XVIII ст. пад уплывам стыляў барока і класіцызму. Сядзіба не захавалася.

Літаграфія 1860 г.

     Сядзіба ў в. Варонча. Карэліцкі раён, Гродзенская вобласць. Драўляны дом пабудаваны апошнім наваградскім ваяводам Юзафам Несілоўскім у 1786 г. у пераходным стылі ад барока да класіцызму. Сядзіба адзначана ў паэме А. Міцкевіча "Пан Тадэвуш". Захаваўся парк.

Малюнак 1875-1876 гг.

     Васкрасенская царква, ратуша, бернардзінскі кляштар з касцёлам св. Антонія ў г. Віцебску. З левага боку двухвежавая царква, у глыбіні ратуша, з правага боку бернардзінскі касцёл з кляштарным будынкам. Храмы разбураны ў 1930-я гг., захавалася ратуша.

Малюнак 1876 г.

     Дабравешчанская царква ў г. Віцебску. Выгляд з боку р. Заходняя Дзвіна. З правага боку старажытная царква ХІІ ст. - помнік полацкай школы дойлідства. Зруйнавана ў 1961 г., адношлена ў 1990-я гг. З левага боку мост праз раку,  у глыбіні царква з тыма купаламі.

Малюнак 1875-1876 гг.

     Замкавая брама ў г. Высокае. Камянецкі раён, Брэсцкая вобласць. Уяздная брама старажытнага замка Сапегаў у Высока Літоўску. Захаваўся падмурак і абарончыя валы. З левага боку ў глыбіні касцёл Святой Тройцы з кляштарам баніфратаў паудаваны па фундацыі князя Аляксандра Сапегі.

Літаграфія з малюнка 1876 г.

     Палац Хадкевічаў у в. Вялікае Мажэйкава. Шчучанскі раён, Гродзенская вобласць. У глыбіні парку фрагмент палаца з калонным портыкам; з левага боку аднапавярховая афіцына. Абодва будынка крыты ламанымі дахамі. Палац пабудаваны ў канцы XVIII ст. у пераходным стылі ад барока да класіцызму пры ўладарах Хадкевічах, згарэў у 1914 г. Захаваўся рэгулярны парк, закладзены ў 1787 г., і лямус.

Малюнак 1875-1877 гг.

     Касцёл Ушэсція Найсвяцейшай Дзевы Марыі ў в. Гайна. Лагойскі раён, Мінская вобласць. Агульны выгляд двухвежавага касцёла (аднаго з сямі, закладзеных у той правінцыі пры Ягайле) з боку р. Гайна. Пабудаваны з цэглы ў 1781 г. ці 1796 г. у стылі барока па фундацыі князёў Тышкевіча і Цыдзіка, на  месцы папярэдняга старажытнага драўлянага храма. Зруйнаваны пад час Другой Сусветнай вайны.

Малюнак 1876 г.

     Замак Рымшаў у в. Гайцюнішкі. Воранаўскі раён, Гродзенская вобласць. Дом абарончага тыпу пабудаваны ў 1613 г. галандскім архітэктарам П. Нонхартам і інжынерам Ван Дадэнам. Замак захаваўся.

Малюнак 1877 г.

     Замак Жабаў і руіны замка Сапегаў у в. Гальшаны. Ашмянскі раён, Гродзенская вобласць. Замак двухпавярховы з гранёнымі вежамі, справа руіны замка Сапегаў 1-й паловы XVII ст.

Малюнак 1876 г.

     Палац Врахоцкіх у г.п. Гарадзея. Нясвіжскі раён, Мінская вобласць. Палац пабудаваны ў сярэдзіне ХІХ ст. у стылі позняга класіцызму; аднапавярховы на высокім падмурку будынак, сярэдняя частка двухпавярховая, завершаная трохвугольным франтонам. Палац не захаваўся.

Малюнак 1864-1876 гг.

     Касцёл св. Ганны і кляштар бернардзінцаў у в. Гарадзішча. Пінскі раён, Брэсцкая вобласць. Барочны касцёл 1774 г. і класічная званіца, акружаныя мураванай агароджай. Кляштар заснаваны ў 1659(62) г. па фундацыі полацкага ваяводы Яна Кароля Копеца, скасаваны ў 1864(5) г. і перададзены дзяржаўнаму казначэйству. Набажэнствы адноўлены ў 1907 г., у 1910 г. адрамантаваны намаганнямі пяцербургскага адваката Алшамоўскага. Кляштар захаваўся.

Літаграфія 1873-1883 гг. з малюнка Н. Орды.

     Палац Васілеўскіх у в. Гародня. Аршанскі раён, Віцебская вобласць. Пабудаваны ў 1852 г. маршалкам Ігнаціем Васілеўскім у стылі класіцызму. Злева першапачатковы дом яго бацькі, маршалка Капыльскага павета Лявона Васілеўскага. Палац не захаваўся.

Малюнак 1877г.

     Сядзіба Адынцаў у в. Гейстуны. Ашмянскі раён, Гродзенская вобласць. Першапачаткова сядзіба належала Радзівілам, потым Іаану Валяну і Ганне з Путкамераў, якія прадалі яе Марыяне Міцкеіч са Свентаржэцкіх, жонцы лідскага канюшанага. Пасля сядзіба перайшла да Адынцаў. Тыповы шляхецкі двор сярэдзіны XVIII ст. з рысамі архітэктуры барока. Сядзіба згарэла ў 1895 г.

Літаграфія з малюнка 1875-1877 гг.