Ансамбль забудовы Высокага рынку (потым - Саборнага пляца, а зараз пляца Волі) фармаваўся на працягу XV-пачатку XX стагоддзяў. Адным з асноўных збудаванняў ансамбля з'яўляецца ратуша, упамінанне аб якой упершыню сустракаецца ў канцы XV стагоддзя. Яна адбудоўвалася ў XVI і XVII стагоддях, у 1744 годзе, у канцы XVIII і першай палове XIX стагоддзяў.

У XIX стагоддзі былі разбураны ці перабудаваны асобныя выдатныя архітэктурныя збудаванні. У вялікай ступені гэта было абумоўлена ўнутрыпалітычнай сітуацыяй, што склалася пасля разгрому паўстання 1830-1831 гадоў. У 1850-я гады ахвяраю стала і ратуша, у якой тады апрача адміністрацыйных устаноў - суда, магістрата, гаўпвахты і архіва змяшчаліся музычная школа і гарадскі тэатр. Фармальнай падставай для зносу паслужыла тое, што ратуша, "...займаючы сабой частку галоўнага пляца, абмяжоўвае яго і закрывае краявід саборнай царквы і новаўзводзімых дзяржаўных устаноў...". Аднак, паводле ўспамінаў відавочцаў, будынак ратушы быў знішчаны з-за таго, што "...ён сваім існаваннем узгадваў жыхарам пра звычкі мінулага часу, пра магдэбургскае права...". На рашенні аб зносе ратушы стаяла уласнаручная рэзалюцыя расейскага цара Мікалая I.

У верасне 2003 года будынак ратушы быў узноўлены (як бачна са здымкаў - не зусім аўтэнтычна) на захаваўшыхся гістарычных падмурках.

Аркуш

1

2

3

4

5

>>>